الثلاثاء، 8 سبتمبر 2015

زفرات رياضي مهموم

متوسط اعمار المهتمين بالرياضه وكمال الأجسام اعمار الدراسة
يعني ما بين 16 الى 19 سنه  :)
ممكن يفهموا رسالة الموضوع ده وممكن لأ...



بس عايز اقولهم واقول لأي حد بلاش تيأس
مطحنه الدنيا هتعدي عليك وهتفرمك وهتخليك مش قادر تبص وراك بس بلاش تيأس
بلاش تقول كفايه لحد هنا ..

انا عارف انه جه الوقت اللي هيكون عندك أولويات اهم
هتفكر في الأرتباط والجواز
هتحطن نفسك شغل ودراسه عشان تجيب فلوس
وفي الأخر حياة روتينيه  :)

معلش اياك ان تيأس
كمل واصبر ومتخليش حاجه توقفك
قول لنفسك انا كل اللي محتاجه للتمرين 3 ساعات في الأسبوع
وتيشرت اتمرن بيه
واشتراك اقل جيم ممكن
والأكل زي ما تيجي معاك  :)
واعرف انك لو قدرت توفر الحاجات دي تبقى انت تستحق لقب بطل لأنك حققت انجاز
كتير غيرك معرفوش يحققوه.

وانت يا صاحب العمر الصغير اعرف ان هيجي عليك وقت وهتدخل المطحنه
وهو ده هيبقى وقت الأختبار الحقيقي..
لما تبقى راجع من شغلك هلكان مرهق ونفسك تتمرن
هو ده الأختبار لما تغصب نفسك تصحى بدري كل يوم ساعة عشان تتمرن فيها ولو في البيت قبل ما تروح شغلك...
لما تطنش خروجة مع خطبتك عشان ميعاد دفع اشتراك الجيم قرب  :)



تعالى لما افوقك..
اعرفوا ان رياضتنا مكلفة مادياً خصوصاً لو انتظرت منها نتائج سريعه
ومحتاجه راحة نفسيه وبدنيه
واعرفوا ان الواقع في بلدنا الحبيب مش بيوفر التلاته مع بعض دفعه واحده الا لفئة قليلة من الناس ويمكن مش بيدوم  :)

انا مش بقولك كده عشان تتشائم .. انا بقولك عشان تستعد
تستعد لما تيجي اللحظة اللي تتعرض فيها للأختبارات الحقيقية

مش عايزك تبص على لاعب كمال اجسام بيضرب منشطات وتقارن نفسك بيه
صحيح انت هتمل وتدايق وتحس انك بتلف في ساقيه لما تبقى بقالك سنين بتلعب طبيعي وتغذيتك مش متظبطه وهو في فترة قصيرة يعمل نتائج احسن منك

معلش اصبر
واعرف ان كل واحد بيجي له وقت كبوه ووقت صحوه
واعرف ان النجاح اوله فشل وعدد مرات الفشل بيزودك ارادة واصرار

بلاش تبعد..
انت بتحب كمال الأجسام عشان هي رياضه
مش مجرد منظره
خد من وقتك 3 ساعات في الأسبوع على الأقل تحافظ فيهم على صحتك
استعن بالله ونظم وقتك

دينك ثم صحتك فدراستك وعملك
قليلٌ دائم خيرٌ من كثير ٍ منقطع