الجمعة، 18 سبتمبر 2015

ازاي تخس بكل سهولة

ببساطه خالص ازاي نخس ؟
هتخس لما تعرف انت تخين ليه...





زي ما اتعودت في اسلوبي معاكم انه يكون بسيط بقدر الأمكان عشان المعلومة توصل للجميع

ببساطه خالص ازاي نخس ؟
هتخس لما تعرف انت تخين ليه

هل انت تخين عشان بتاكل كتير وبتلغبط في الأكل وكسلان ومش بتتحرك كتير
ولا تخين عشان عندك مرض وراثي لا قدر الله
انت تخين ليييييه ؟

مفيش حاجة اسمها متنفعش تخس
بس في حاجة اسمها انت مش فاهم تخس ازاي او مش قادر ومعندكش عزيمه انك تخس

لو مش فاهم..ان شاء الله هتفهم
لكن لو معندكش عزيمة اخرج واقفل الموقع بتاعي واطلع براااااا (بهزر هههه) لأنك مش هتخس بدون عزيمة قوية ،،
وسيبك بقى من كلام الدعايا بتاع التلفزيون لا حزام ولا شورت ولا حبايه ولا كريم كل ده كلام فاضي

لازم تعرف انك لازم هتتعب وتبذل مجهود عشان توصل لهدفك.

نتكلم كلام عملي شوية

الأول لازم تعرف مستوى الخطر عندك قد ايه
الخطر يعني السمنه الدهون الشحوم
ملظلظ قد ايه من الأخر

طيب هتعرف منين في ناس بتقول بمعادل كتلة الجسم او body mass index واذا طلع ما بين كذا وكذا تبقى كويس وما بين كذا وكذا يبقى خطر

وللأسف ده مينفعش نحكم بيه لأن معادل كتلة الجسم بيتحسب بالطول والوزن ممكن تفيد الأنسان الغير الرياضي او اي حد مش بيمارس كمال اجسام وعنده وزن من الدهون....
متجبش واحد وزنه 80 كيلو منهم 15 كيلو عضل
جنب واحد وزنه 80 كيلو منهم 20 كيلو دهون !

فالطريقة الأنسب هي قياس نسبة الدهون بالجسم
وده شرحناه في الموقع قبل كده

عرفت نسبة الدهون في جسمك كام ؟
كبيرة ؟

بص يا بطل لو ازيد من 20% منصحكش تسكت على نفسك انت لو طلعت شوية سلالم هتنهج
ازيد من 20% هتبقى اكيد بكرش وشكلك وحش
ازيد من 20% لا قدر الله تبدأ مرحلة الأصابة بلأمراض زي السكر والضغط

يبقى اي انسان رياضي او غير رياضي الأفضل يبقى اقل من 20% دهون

طيب هتنزل الدهون من جسمك ازاي ؟
1: هتنضف اكلك وتفهم تاكل ازاي
2: مارس رياضة وخليك اكتف في حياتك

الأول تنضف اكلك وتفهم تاكل ازاي
باين من كلمة تنضف ان في حاجة غلط في الأكل
واول غلط في اكلنا هو السمنه والزيت والعيش الكتيييير والمكرونات والمحاشي والذي منه
امنع السمنه نهائي والزيت يبقى زيت زيتون ومش كتير من 1 الى 2 معلقة في اليوم على اكلك
والعيش احنا ما شاء الله بناكل بـ 4 ارغفه في الوجبه الواحده
وانت لو تعرف العيش ده بيتعمل من ايه مش هتقرب منه اصلا،
العيش رغيف او رغفين في اليوم كله يبقى حلو اوي

تاني غلط في اكلنا هو انك متعرفش تاكل ايه وامته
يعني ممكن واحد لسه صاحي من النوم الصبح يروح ياكل طبيخ ههههههه مهو اللي موجود بقى هيعمل ايه

لازم تفهم يعني ايه بروتين ويعني ايه كارب بسيط وكارب معقد وفيتامينات ودهون مفيده لازم تعرف الحاجات دي
ودي كلها مشروحه الحمد لله في الموقع عرب فيتنس اونلاين وممكن تطلع عليها
وهتلاقي كمان امته تاكل العناصر الغذائيه والمقدار بتاعهم




تاني حاجة ممارسة الرياضة وخليك نشيط
خلي حركتك اكتر من جلوسك
خليك عصبي في حركتك متطلعش السلم واحدة واحدة انت شاب رياضي عيب .. اطلع السلم جري
متمشيش في الشارع كسلان وبتشد في رجلك بالعافية
شد نفسك في مشيتك ولا تخليها بالبطيء ولا بالجري خليها كأنها مد متوسط
متاكلش وتنام سيب وقت ساعتين على الأقل قبل النوم
حاول بعد ما تاكل تتحرك عشان تساعد على هضم الأكل وحرق السعرات الحرارية
اجري 4 مرات في الأسبوع لمدة 20 دقيقة وبسرعة دقيقة بسرعة ودقيقة امشي براحه
لو مش قادر تمارس الكارديو امشي كل يوم ساعة وانت بتمد


انا تقريبا خلصت بس هقول حاجة اخيره
مينفعش اكتب جدول غذائي عام الكل يمشي عليه زي ما كتير من الصفحات على الفيس بوك بتعمل
لأن كل واحد ليه طبيعة غير التاني ووزن غير التاني ..
ممكن واحد يكون مريض لا قدر الله او النظام مش هيناسبه والنظام اللي يناسب غيرك مش شرط انه يناسبك
فالي انا بعمله اني بحط قواعد وانتم عليكم تمشوا عليهم الا لو بشكل خاص ممكن اكتب نظام محدد ودقيق سواء غذائي او تدريب

بأختصار قلنا افهموا الأكل ونضفوه وقسموا الوجبات لوجبات صغيره من 5 ل 7 وجبات
وامشوا كل يوم ساعة بشرط تكون بتمد ومتواصلة
بجانب رياضة كمال الأجسام
وعايز اقول لو حد فيكم جرب يمنع السمنة والزيت ويقلل الخبزبجانب اكل صحي لمدة شهر مع باقي التعليمات اتفرجوا على النتيجة ان شاء الله هيشوف تغير كبير

لو في اي حاجة مش مفهومة اتفضلوا اسألوا